लुम्बिनी । स्थानीय युवाबीच सामान्य विवाद हुँदा कुटपिटबाट एकजना युवकको हत्या भएको छ । पाल्पाको तिनाउ गाउँपालिका–२ दोभान घोडेबासका २४ वर्षीय सुनिल खत्रीको साथीहरूको कुटपिटबाट हत्या भएको जिल्ला प्रहरी कार्यालय पाल्पाले जनाएको छ ।
इन्स्पेक्टर सन्तोष चन्दका अनुसार स्थानीय युवाबीच विवाद बढ्दै जाँदा गएराति साढे १२ बजेतिर युवकमाथि कुटपिट भएको थियो । गम्भीर घाइते खत्रीलाई उपचारका लागि लुम्बिनी प्रादेशिक अस्पतालमा ल्याइएकोमा उपचारका क्रममा राति पौने २ बजे बजे मृत्यु भएको चन्दले जानकारी दिए ।
तीजको दर खाएर राति महिला नाचिरहेका बेला युवाबीच विवाद भएको थियो । त्यही विषयलाई लिएर भएको झगडाले उग्ररूप लिएपछि खत्रीमाथि कुटपिट भएको प्रारम्भिक अनुसन्धानबाट खुलेको प्रहरीले बतायो ।
हत्याको आरोपमा चारजना युवालाई प्रहरीले नियन्त्रणमा लिएको छ । तर, प्रहरीले थप विवरण खुलाएको छैन । जिल्ला प्रहरी कार्यालय पाल्पाका प्रमुख प्रहरी उपरीक्षक हेरम्ब शर्मासहितको टोली घटनास्थलमा पुगेर थप अनुसन्धान गरिरहेको छ ।
