बुटवल–पाल्पा सडक खण्ड पहिरोका कारण अवरुद्ध

बुटवल । सिद्धार्थ राजमार्गको बुटवल–पाल्पा सडक खण्ड पहिरोका कारण अवरुद्ध भएको छ । तिनाउ गाउँपालिका–३ स्थित तिस माइलमा पहिरो जाँदा राजमार्ग अवरुद्ध भएको दोभान प्रहरी चौकीका सई कमल थापाले जानकारी दिए ।

पहिरोसँगै रुख ढलेर सडकमा खसेको हुँदा पहिरो पन्छाउन समय लाग्ने थापाले बताए । राजमार्ग अवरुद्ध भएपछि सयौँको सङ्ख्यामा सवारी साधन बीच बाटोमा रोकिएका छन् । कयौँ यात्रु गन्तव्यमा पुग्न नसकेर बीच बाटोमै अलपत्र परेका छन् । सडक डिभिजन कार्यालय पाल्पाको एउटा जेसिबिले पहिरो पन्छाउने काम भइरहेको प्रहरीले जनाएको छ।