दुलेगौंडा
शुक्लागण्डकी जेसीजले सप्ताहव्यापी कार्यक्रम गर्ने भएको छ । मंगलबारदेखि सुरु हुने सप्ताहन्त कार्यक्रममा सात फरक सामाजिक सेवाको कार्यक्रम गर्न लागिएको हो ।
मंगलबार विहान शुक्लागण्डकी नगरपालिका–२ मा रहेको मुक्तिनाथ शुक्लागण्डकी च्यवनधाममा ‘वाटर डिस्पेन्सर’ हस्तानतरण गरेर सप्ताहन्त कार्यक्रमको उद्घाटन हुनेछ ।
दिउँसो शुक्लागण्डकी नगरपालिका–४ र ८ मा शुक्ला हिलेटार पुल्चोकमा हुने हरिबोधनी एकादशी मेलामा निशुल्क पिउनेपानी वितरण गर्ने सहसंयोजक अनिषकुमार ढकालले जानकारी दिए । उनका अनुसार मेलामै निशुल्क स्वास्थ्य परीक्षण कार्यक्रमको आयोजना गरिएको छ ।
कात्तिक ३० गते इलाका प्रहरी कार्यालय बेलचौतारामा विस्तारै मोटरसाइकल चलाउने प्रतियोगितासँगै ट्राफिक सचेतना कार्यक्रमको आयोजना गरिएको छ । त्यही दिन दिउँसो नेपाल प्रहरी स्कुल बेलचौतारामा अन्तर विद्यालय हाजिरी जवाफ प्रतियोगिता हुने जनाइएको छ ।
मंसिर १ गते विहान निर्मल आधारभूत विद्यालय वन्केवामा शैक्षिक सामाग्री वितरण गर्ने तय भएको हो । शुक्लागण्डकी नगर उद्योग वाणिज्य संघमा निर्वाचित नयाँ कार्य समितिलाई बधाइ ज्ञापन गर्दै जेसिज सप्ताहको समापन गर्ने तालिकामा उल्लेख छ ।
