दुलेगौँडा । पौष ९ र १० गते संचालित १५ औं जिल्लास्तरिय राष्ट्रपति रनिंङ शिल्ड प्रतियोगितामा शुक्लागण्डकी दोस्रो भयो । दश पालिकामध्ये शुक्लागण्डकीलाई जिल्लामै दोस्रो स्थान हाँसिल गराउन उत्कृष्ट खेल प्रर्दशन गरी पदक जित्ने खेलाडीलाई शुक्लागण्डकी नागरपालिकाले सम्मान गरेको छ । बुधबार नगरपालिकामा एक कार्यक्रम गरी नगर प्रमुख कृष्णराज पण्डित, प्रमुख प्रशासकीय अधिकृत रामचन्द्र लामगादे, नगर प्रवक्ता एवं वडा नं ३ का वडाध्यक्ष सचिन भुजेल, ४ नं वडाध्यक्ष राजकुमार वाग्लेले पदकधारी एवं सहभागी खेलाडीहरुलाई नगदसहित पुरस्कृत गरेका हुन् ।
रनिङ शिल्डमा शुक्लागण्डकीले ५ स्वर्ण, ३ रजत र ३ कास्य पदक जित्दै दोस्रो भएको थियो । शुक्लागण्डकीले छात्र र छात्रा दुवै विद्याको भलिबल स्पर्धामा स्वर्ण पदक जितेको थियो । छात्र समुह निश्चल गोतामेको कप्तानी र छात्रा समुह अनिशा शाहीको कप्तानीमा स्वर्ण जित्न सफल भएको हो । भलिबलको व्यवस्थापकमा राष्ट्रिय भलिबल रेफ्री टुकबहादुर र किसान थापा रहेका थिए ।
यसैगरी ४०० मिटर छात्रतर्फको रिले दौडमा सुरज हमाल ठकुरी, सुमन सेजवाल, इन्द्रबहादुर वि.क र सुदिप भण्डारीको समुहले स्वर्ण पदक जितेका थिए । छात्रातर्फको हाइजम्प र लङ्गजम्पमा मनकुमारी लामाले स्वर्ण पदक दिलाएकी थिइन् । त्यस्तै, ८०० मिटर छात्र दौडमा सुरज हमाल ठकुरीले रजत, छात्रा सटपुटमा कृष्ण खड्का मगरले रजत र १०० मिटरको छात्र दौडमा सुदिप भण्डारीले रजत पदक जितेका थिए भने छात्र लङगजम्ममा आश्विन थापा र सटपुटमा आयुष हमालले कास्य पदक जितेका थिए । ४०० मिटर रिले दौडमा सुदिप भण्डरी, अंकित रानाभाट, विजय तामाङ र सुमन जेसवालको समुहले कास्य पदक जितेका थिए । सो अवसरमा खेल संयोजक लेखमान श्रेष्ठ, भलिवल व्यवस्थापक गुरुङ र थापालाई पनि सम्मान पत्र प्रदान गरी सम्मान गरिएको थियो ।
