दुलेगौंडा
तनहुँको शुक्लागण्डकी नगरपालिकामा विशेषज्ञ डाक्टरसहितको स्त्री रोग सम्बन्धी निशुल्क स्वास्थ्य परीक्षण तथा उपचार शिविर भएको छ ।
शुक्लागण्डकी नगरपालिका र स्वदेशी नेपालले १२ वटै वडालाई लक्षित गरेर शिविर गरेको हो ।
शिविरमा ५३५ जनाले स्वास्थ्य परीक्षण गराएको स्वास्थ्य शाखा प्रमुख ढालबहादुर थापाले जानकारी दिए । उनका अनुुसार २५९ जनामा पाठेघर सम्बन्धि समस्या देखिएको छ ।
‘शिविरमा ३५ जनाको रिङ राखिएको छ । ८ जनाको अप्रेसन गर्नुपर्नेछ’, उनले भने, ‘उनीहरुको निशुल्क अप्रेसनको व्यवस्था मिलाइएको छ ।’
चिर मेमोरियल हस्पिटल बनेपामा निशुल्क अप्रेसन गरिने उनले जानकारी दिए ।
आइतबार ढोरफूलबारी शहीद अस्पातलमा सुरु भएको शिविर शुक्रबार स्याउलीबजार आधारभूत स्वास्थ्य केन्द्र बगैचामा समापन गरिएको छ । थप्रेक, लामागाउँ, दुलेगौंडामा समेत शिविर सञ्चालन भएको थियो ।
वुमन फर वुमन फाउण्डेसन नेदरल्याण्ड र वाइल्ड गान्जेन फाउण्डेसनको सहयोगमा भएको शिविरमा स्त्री रोग विशेषज्ञसहितको टोलीले सेवा दिएको हो ।
