पोखरा
सेवाग्राहीको गुनासो आएपछि गण्डकी प्रदेशका भौतिक पूर्वाधार विकास तथा यातायात व्यवस्था मन्त्री प्रकाशबहादुर केसीले यातयात व्यवस्था कार्यालय बागलुङमा छड्के निरीक्षण गरेका छन् ।
बुधबार उनले प्रयोगात्मक परीक्षा स्थल (ट्रायल सेन्टर) को छड्के निरीक्षण गरेका हुन् ।
बागलुङ नगरपालिका–१ खनियाबासमा रहेको ट्रायल सेन्टरको छड्के निरीक्षणमा पुगेका उनले ट्रायल सेन्टरको भौतिक अवस्था र प्रयोगात्मक परीक्षाको विषयमा जानकारी लिए ।
दुई पांग्रे र चार पांग्रे सवारीको परीक्षा प्रणालीलाई पारदर्शी बनाउन उनले निर्देशनसमेत दिएका छन् ।
यातायात कार्यालयका निमित्त प्रमुख अशोक घिमिरे र ट्राफिक प्रहरी प्रमुख सुमन न्यूरेलाई मन्त्री केसीको निर्देशन थियो, ‘पारदर्शी ढंगले परीक्षा सञ्चालन गर्नहोस् ।’
सीसीटिभी फुटेज एक महिनासम्म रेकर्ड राख्न, भीडभाड नगर्न, परीक्षास्थलको सरसफाइ गर्न र परीक्षार्थीको मनोबल उच्च रहने वातावरण मिलाउन सुझाएका छन् ।
मन्त्री केसी पछिल्लो समय ठूलो लगानीका पूर्वाधार निर्माण र यातयात क्षेत्रमा भएको समस्याको पहिचानका लागि जिल्ला दौडाहमा निस्कन थालेका छन् ।
