पोखरा
गण्डकी प्रदेश सभा सदस्य राजीव गुरुङ (दीपक मनाङे) ले सर्वोच्चको फैसलाको पूर्णपाठ आएपछि आफैं अदालत उपस्थित हुने बताएका छन् ।
शुक्रबार प्रेस वक्तव्य जारी गर्दै मनाङले आफू सम्र्पविहीन भएको भनेर सञ्चार माध्यममा आएका समाचार झुठो भएको बताएका हुन् । कात्तिक २० गते सर्वोच्च अदालतले मनाङेलाई ज्यान मार्ने उद्योगमा दोषी ठहर गरेको छ ।
मंगलबार न्यायाधीश डा. नहकुल सुवेदी र टेकप्रसाद ढुंगानाको इजलासले उच्च अदालत पाटनको फैसलालाई सदर गरेको हो । मनाङेको समूहले २०६१ सालमा गुण्डा नाइके चक्रे मिलनमाथि तरबार प्रहार गरी हात छिनाएको थियो । त्यही मुद्वामा उच्च अदालत पाटनले ५ वर्ष कैद तोकेको थियो । सर्वोच्चको फैसलापछि उनी सम्र्पकविहीन छन् ।
मनाङेले विगत केहि दिनयता विभिन्न अखवार र सामाजिक सञ्जालमा मेरो विषयमा लेखिएका समाचार र टिकाटिप्पणी प्रति मेरो गम्भिर ध्यानाकर्षण भएको उल्लेख गरेका छन् ।
‘सम्मानित सर्वोच्च अदालतमा विचाराधिन मेरो मुद्धाको गत कार्तिक २० गते फैसला भएको विषय मैले मेरो तर्फवाट वहस पैरवी गरिरहेका कानून व्यवसायीमार्फत थाहा पाएको हुँ । सो पश्चात मेरा कानुन व्यवसायीलाई फैसलाको नक्कल सार्न पठाए तर, अदालतबाट फैसलाको संक्षिप्त पाठ तयार नभएको भन्ने जानकारी आयो’, विज्ञप्तिमा उनले भनेका छन् ।
उनले लेखेका छन्, ‘फैसला आउदाको दिनदेखि केहि गुणस्तरहिन सञ्चार माध्ययमहरुबाट तारन्तार आईरहेका कलहरुले गर्दा केही समयका लागि मैले प्रयोग गर्दै आएको मोबाइल बन्द गरेको छु । यहि विषयलाई लिएर विभिन्न सञ्चार माध्ययमहरुमा भ्रामक समाचारहरु सम्प्रेषण भइरहेको पाएको छ । यसमा मेरो आपत्ति छ ।’
उनले सर्वोच्च अदालतबाट फैसलाको पूर्ण पाठ लिखित रुपमा प्राप्त भएपछि अदालनमा स्वयम् उपस्थित हुने दाबी गरेका छन् ।
गुण्डागर्दी पृष्ठभूमिका मनाङेले गत निर्वाचनमा मनाङ (ख) बाट गण्डकी प्रदेश सभामा सर्वसम्मत निर्वाचित भएका थिए । उनले २०७४ मा पनि मनाङ (ख) बाट निर्वाचित हुँदै संसदीय यात्रामा डेब्यु गरेका हुन् ।
उनी गण्डकी प्रदेश सरकारमा छैठौं पटकसम्म मन्त्री भएर रेकर्ड बनाएका छन् ।पछिल्लो पटक भदौ १७ मा गण्डकी प्रदेश सरकारमा नेकपा एमाले सहभागी भएसँगै मनाङेले राजीनामा दिएका हुन् ।
उनलाई भौतिक पूर्वाधार विकास तथा यातायात व्यवस्था मन्त्रालयबाट वन मन्त्रालयमा सारेपछि असन्तृष्ट बन्दै राजीनामा दिएका थिए ।
